Puisi Karo: ERKUNE-KUNE WARI MINGGU (4)

1
769

Sekalenda erkune me pusuh ikut erminggu
Petempa-tempa ndengkehken Padan Simbaru
Situhuna ngikutken pedah Nande Ginting Simberu
“Ku gerejalah kam adi payo ngena atendu aku”
“Bahanlah berita si meriah man cikepenndu”
“Adi lang, mbiar kal aku arihta mosar la tudu”
Bageme beru Ginting ersumekah rikut atena aru

Tuhu sedekah enda aku bagi agama Perbegu
Kalak ku gereja aku dekahen ternunu-nunu
Ngikut-ngikut lagu teman sada kandu-kandu
La ku gereja adi la tupung Natal ras Tahun Baru

Erpagi-pagi si lampas enggo lawes ridi ku lau
La ndobah bagi perlampas kalak si ngelar bubu
Bage bergehna Berastagi tahanken me ngilu
Gelahkal sendah nese dunut daging ola mbau
Mulih lau nari ipegara gosoken arangna sudu
Nggosok baju si enggo ikanji gelah bagi mbaru
Ope gosoken melas terakap kentisik cicudu
Janah cicudu pe isempatken nggatipi silu-silu
Silu-silu sintelap nggo pas bagi silu-silu arimau
Pendahin ijanah-janahken bagi kalak merudu
Ngayak-ngayak Nd. Ginting si erpudun jam pitu

Seh i rumah Nd Ginting idah cirem ia lebe-lebe pintu,
La iarapna aku seh rumahna jam pitu kurang suku
Itatapna ka lereng pe lereng sport model si mbaru
La etehna tukar pake lereng kami ras pengulu
Sope isuruh minter ia nangkih cikepna awakku
Awak icikepna jantung nggo debet-debet kidu
Teridah me la enggo pernah mbonceng diberu
Ngayak seh gereja kurang belas-belas tempa kami rebu.

Ope denga pandita ngogeken pedah-pedah kata tuhu
Li kepe momo ngataken sendah lit si erjabu i pasu-pasu
Edejeb me pusuh janah ndauh me tangkel-tangkelku
Alu la isengaja sekalenda nggo kepe lit ingan ngguru
Tah uga pagi sue arih anak beru ras kerina kalimbubu
Tah pagi sahun surung ras Nd Ginting ate tutus erjabu
Turah me ukur dung acara gereja ngikuti acara pasu-pasu

Ipasu-pasu Dibata kam sekalak-sekalak seh ku jabundu,
Ras umputenna ibelasken Pandita tanda dung erminggu
Nd. Ginting enggo darat ras temanna sapih-sapih diberu
Aku i pudi nari ngarakken ia si telu sada kandu-kandu
Janah cirem-cirem teluna i oratina ongkos gereta sadu
Ongkos ku Peceren,ongkos ku Gundaling ergana seribu
Ipilih me ku Peceren, mulihna kundul-kundul Bukit Kubu
La banci lahang ititipken me lebe i gereja lereng pengulu
Tanda ate tutus ngikutken sura-sura Nd Ginting si mberu.

Enda me sendah kune-kune wari Minggu man ogenndu
Oge sanga salang ukur ras pendahinndu pe la terganggu
Adi kune-kune kai pe banci nge belasi, labo kerina tuhu-tuhu
Kuja nge dabuhna kune-kune enda sungkunlah pusuhndu
Ola ate morah ola ate aru, bagenda me sekalenda beluhku

(Cibinong, 10/02/2013, selamat wari Minggu)

Inilah jawaban tafsir redaksi terhadap puisi di atas. Kebetulan pula pasangan menari penyanyi adalah seorang beru Ginting (Erna br Ginting) yang juga vokalis Sanggar Seni sirulo

1 COMMENT

  1. Redaksi,
    Kenakal kuakap sekalenda jawaben e, lanai kuakap tafsir ngenca tapi datsa kuakap ukurku pe.
    Sekalend ku sempatken nulis isi pusuhku kerna nuratken Kune-Kune Wari Minggu. Situhuna nulisken KKWM enda enggo jadi sada perjuangen man bangku erkiteken :
    1. Sanga nulis KKWM pemena, eseng-eseng sajange janah sada e me ngenca ate i suratken sanga dat-dat ukur. Tapi minter i tantang Sora Sirulo (SS) ras teman si deban maka i lanjutken, piah ergerek ka dareh ngudaku nai.
    2. Ngaloi tantangen e, minter turah bas pusuhku maka i jadiken prosa liris si semi nyata emaka ku usaheken setting waktu ras ingan kejadian. Piah ku setting waktu tahun 70an, ras tempat sekitar Berastagi atau Tanah Karo. Perjuangenku eme kap nginget-nginget cerita nyata ras keadaan Berastagi/Tahan karo 30 tahun si lepus.
    3. Erbahan mejile sitik, kubahan alu kata-kata karo se asli mungkin janah si ndekah. Perjuangenku eme kap ndarami perbendaharaan kata2 dekah, piah lit ka deba teman iape erjuang ngantusisa. Sempat ku sungkun tah perlu i ganti kata2 si gundari, nina ka ola bagename si payona. Emaka si ngoge pe ikutka erjuang.
    4. Perjuangen nuriken sada cerita jadi gaya Prosa Liris (mesera kepeken)
    5. Aku nggo ndekah nadingken bena buluh, lebih 30 tahun merantau ku ingan si Kalak Karo pe bagi si kurang, janah lingkungenpe kurang me-Karo. Aku erjuang mulihi erbahan cakap karo si mehuli ras nginget2 tata kegeluhen Kalak Karo asli.
    6. Keterbatasen waktu, sebab nandangi deadline me usur i tulis (Wari Minggu).
    Bagem, mbera i pedauh Dibata kita bas mara klesa nari janah njujuri Ia man sura-suranta…. amin.
    Bujur,
    HMS

Leave a Reply