Puisi Karo: KUNE-KUNE WARI MINGGU (5)

0
208

Oleh: H.M. Sitepu

 

Endame Kune-kune Wari Minggu numbur Lima
Kune mbera sekelenda rejeki pe enggo ertima
Ngayaki rejeki si ertima legi me ku Surabaya
Surabaya si tergelar Kota Pahlawan negaranta
Itadingken Berastagi ras si mberu ate ngena
Gia sekali nina pusuh labo min bage arusna
Dage enggo erpudun sendah pe radu ku gereja
Mulih gereja nari nggo iaturken bagi si biasana
Gawah-gawah ntah ku Gundaling ntah ku Tahura
Bagem turang ola ate morah lit nge pagi masana.

Empat wari sendah enggo dekahna i Surabaya
Nderbi ibas wari peteluken jumpa Guru sada
Si nina mesinteng ertabas pedauh mara kleisa
Si mada pemeteh niktik wari si kerna sura-sura

“Adi ersura kam banci si tik-tik lebe warina
gelah si eteh kai nge ndia si banci alang abatna
kune kai kari alang abatna endame tendi berita”
Bage nina Guru Mbelin enda ndai erkata bana

Bagi kalak si langa mbengket ku kata Dibata
Niikutken me kai nina Guru Mbelin enda
iturikenme kini tutusen nandangi ate ngena
ibere me kerina pulungen bagi si ni ipindona
Ersumekah me ia ndilo juak-juak jinujungna

“O kam Si Nabo, Si Ari-ari, si Tonu ras si Dara
pulung metunggung lah kena reh kerinana
kita sendah radu niktik wari kerna sura-sura
ersentabi aku, pitu persentabinku man kena
baba si pecah pinang, seh kena ku Dibata
kari kena kusungkun uga kerna tendi berita”

Ibul-bulina se ncepik pinang si dua-dua
Janahna ercakap-cakap nina ia ras jinujungna

Ola sengget ola ermorah ate tendi ni ibaba
Kune sekali la mehuli kata bas Tendi Berita
Perpadanen labo kepe lit ras ia ateta ngena
Sebab ia megegeh kepe si nagang-nagangsa
Gegehen kepe asa urat kayu pengkih ipersada
Paguhen asa papan paguh-paguh batang pola
Surut me kita bagi sinuruti ranting si nggo gara
Adi la suruti nakan meseng jadi kus-kus gelarna
Tataplah dauh-dauh nari gelah ola nambah suina
Mbera lit pagi mberu la tambat gancih sambarna

……………………………………………………………….
(Surabaya, 17/02/2013)

Redaksi menjawab puisi di atas dengan 2 buah clip lagu Tuala Toge-toge (cipt. Tipan br Sembiring). Clip pertama dinyanyikan oleh seorang Mama Karo kepada Nande Iting, sedangkan clip ke dua dinyanyikan seorang Nande Iting kepada Mama Karo.

Selamat menonton!

Leave a Reply