Puisi Karo: ERKUNE-KUNE WARI MINGGU (6)

Oleh: H.M. Sitepu

 

 

Erkune-kune me sendah ukur mulih ku kuta
Nurihi ukur si sangana melalakal perbebenna
Kerna tendi berita si peseh guru Surabaya
Kerna ate jadi si enggo meteguh tambatna
Suruti ningen enggo gara pusuh ibahanna
Niterusken ningen megegeh guru si arah ia
Endam perbeben perukuren kalak Pemena
Si langa erkesehen kinitekenna man Dibata
Lanai tempa terturihi adi aku ertangkel si sada

Reh nina pengulu kuta si lit ka pemetehna Pemetehna kerna si ilakoken kalak si noria “Sidarmilah guru Mbelin man penggurunta i Paropo, i Pusuk Buhit, melala enda inganna apai pe enda megegeh, ipindo penampatna ola minter surut adi kerna si bagena rupana ugapa pe penagangina meluah nge dungna Bagem nina pengulu bagi si nangkih darehna La gejabna isap “Kansas” e pe cepcep la gara Aturna ngeranai piah isap pe lupa naganisa

Ersada arih ndahi Guru Sibaso si ndauh kal kutana
Kerna uga serana ndahisa ituriken pe la gunana
Si nggo nambah tangkelen e me kerna pedahna
Kerna arih Tendi, Pusuh, Kula ras Ukur la ersada
Pertendin Karo mergana beru Ginting me upahna
Tapi labo br Ginting si enggo meteguh iketna
Reh nina pusuh ber Ginting si mberu ndai maka
Perpadanen pagi singgah me ku beru si debanna
Enda me erbahansa Kula ras Ukur ndat suina
Emaka nina perlu erpangirken pangir sintua
Pangir si megegeh pedauh kerina la bagi nisura
Gelah nangtang kerina liah-liah ras mara kleisa

bulung-bulung simalem-malem simelias gelarIpesikap guru kerina pulungen si sepulu sada
Lumut Pitu Silam, kacilulu nipe, la banci lupa
Besi-besi sangka sempilet, sibalik sumpahna
Bulung sibalik angin, bulung sarang tersada
Bulung peldang rikut bulung peldang raja
Bulung abang-abang, bulung lulang menjera
Padang lalis, kerina ipersada dem sada raga
Tambah si sepulu sada emekap manuk megara
Kerina enggo sikap rikut tabas mang-mang gelarna
Dung erpangir seh ku ngambekken sanga-sanga
Guru ertabas sekali nari janah enturna, nina:

“Aloken min begu si malang sai, aloken nini raja
Raja Kaloppung ras suruh-suruhenndu kerina
Si Maba, Si Ari, Si Tonu, bagepe kam o Si Dara
Aloken pangir persilihi si liah Karo mergana
Akuken si la mehuli man Karo mergana enda
Bandu deraham Patamas, Manok Megara
Dagangen mbentar, nakan pelen-pelen cina
Datang-datangen, upahndu megegeh kerina
Ngaloken cilaka man kula ras ukur Karo mergana
Sumpak singari-ngari ku ia karinana”

Endame sendah Kune-kune Wari Minggunta,
Janah erlajar menda kita kerna kalak si noria
Uga pagi tak-tak cibal ulihna sitatapen kita
Selamat wari Minggu dua pulu empat bulan dua
Mejuah-juah kita kerina, pedauh mara kleisa

(Bogor, 24 Februari 2013)

Inilah jawaban sidang redaksi untuk puisi ini

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.