Puisi Karo: ERKUNE-KUNE WARI MINGGU (7)

Oleh: H.M. Sitepu

Wari minggu bagenda erbage-bage pindahin jelma,
Perkune-kune lalap menda erkune-kune denga,
Sendahpe terus me erkune-kune kerna ate ngena,
Sanga pegejabken ulih erguru uga ndia pengenaina,
Nggo lawes Mama Karo ndai ku Gundaling si sada,
Pudun ras Beru Ginting si mberu osarina kerina,
Babana surdam, suling, baluat man embusenna,
Kundul Mama Karo i sada sapo terulang rih tarumna,
Wari pe sangana gembura nambahi lenget ras risona,
La ndobah bagi berngi si ngongo melino, la lit jelma,
Janah natap-natap ku Sinabung, Sibayak, Juma Raja,
Jemak surdam Buluh Lumang si melenget sorana,
Embusna sada lagu Pio-pio sue ras lino pusuhna.

Bagi kalak si melayah tendi, lanai akapna ia i pertibi,
Kula ras pusuh ngenca i doni tendi tah ija ngadi-ngadi,
Guru si baso ras guru si nagangi Beru Ginting sanga rubati,
Pusuh Mama Karo ras tendi pe bagi perang kandi-kandi,
Pusuh ras ukur nandangi Beru Ginting lalap la terpengadi,
Emaka erkune pusuhna sekalak kerna uga pagi si terjadi,
Kune si beru ginting gia tutus kal sura-surana nepati janji,
Kune la aku ngasup sirang Mama Karo nina gia pepagi,
Kune mehuli kal gia perbahanenna ras beluh nami-nami,
Adi sirangkenna ka nge pagi dungna gia la bas ukurna nari,
Adi padan labo ersada, piah nambah me ate mesui,
Piah kerina me pe pagi nambah suina la erngadi-ngadi,
Embusna suling janah pusuhna rende nginget ate jadi:

Sedekah kita sirang turang kukelengi,
Suari berngi Karondu ertemanken iluh,
La aku ngasup sirang Mama Karo bage nindu,
Nambah-nambahi ceda pusuhku,
La kueteh salahku isirangkendu aku,
Gundari ersada nindu enggo melawensa,

Aku pe labo ateku sirang Nande Iting,
Padanta nge ndube nirangken kita,
Adi tedeh pagi atendu aku,
Tatap gambarku e gancih kulangku,

Olanai bagi si gel-gel perbahanenndu Bere Biring,
La erngadi oh turang, la erngadi bandu suina,
Olanai bagi si gelgel lagu langkahndu kukelengi,
Bias me turang, bias me aku maba suina.

Mejuah-juah kukelengi,
Mejuah-juah aku sirangken kena,
Mbera sangap pagi kita duana,
Jumpa kam jumpa aku ras ate ngena.

Isi lagu siendeken Mama Karo kune-Kune pusuh,
Tah payo nge bage si terjadi labo lit ise si meteh,
Sea katan Dibata, kita erkune-kune ngenca beluh,
Emaka labo gunana kune-kune enda erbahan teriluh,
Gia sekalenda si rutang pusuh enggome meteh,
Kuja pagi perlawes kune-kune minggu si reh

(Cikarang, tanggal telu bulan telu, iyo oh lanai kueteh)

Bukan tanggung-tanggung ke tiga lagu yang dikumandangkan Beru Ginting dan Mama Karo ini beserta dialog-dialog mereka berdua yang tampaknya sangat mendekati kisah yang terkandung di dalam puisi di atas. Huh ….. Semakin seram! Apalagi lagu yang terakhir dimana si Beru Ginting berkata “labo aku sisalah, labo aku silepak, kita sirang perbahan kam mata keranjang” nina. Iyo oh kusukula. 🙂

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.