Bilang-bilang Beru Karo: O Kam Simeganjangna

elisabeth barus 8

Elisabeth Barus (Medan)

  

Ercakap menda pusuh

nangdangi sundutna matawari

 

Amin enggo gia ibas-bas kerina suki taneh e

amin enggo gia raleng-aleng tendi e

ku rumah gia simada jabu nini mehantu ndube

ngelangke ngeliwer gia perlandek e

sapa nge ndia nipindu e?

 

Erdire-dire gia iluh mambur

suang ngempet suang mesuni sorandu serko

 

Ooh…. andiko

lanai kepé atan ari

adi nggo tersurat ndube padan taneh enda

simada ngenca sibanci ngaturkenca

 

Bage perjilena bunga ncole simerim

bage jilena perturah sinuan sinuan i tengah juma

lanai kepe lit ertina kerina

bene sura-sura tua-tua sicawir

natap reba inganna cio-cio

 

Ooh…. andiko

merawa kin nge tendindu

o Taneh Karo Simalem?

 

Suratkenlah o kam kalak si nuria

uga kata tenah nininta ndube

endéken dagé o kam si rendé

tupung pusuh mesuni

cawir ban sorandu seh ku Dibata

 

Ntah cupingta nge si la erpemegi

maka bage pe belinna sora deleng si mehantu e la terbegiken kam?

kerina nggo pasek

seh wari enda pe pasek denga kerina

 

Kai nari ban rakutnna nini?

adi perlandek ndai pe lanai rikutken gung ras penganak

lanai terbegi sora belobat simelenget tengah berngi e

adi kin kernep taneh ingan pusung ndabuh ndube

kai nari nge pagi si man tulihenken?

 

Sentabi aku o kam si Meganjangna

ula min hukumndu kami

banlah maka entabeh mata kami natap ku deleng si meratah ndube

ulihken dage alu lias ras kemulianndu

sebab koté kami

 

O kam si Meganjangna

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.