Oleh: Elisabeth Barus (Medan)
Didong doah simanteki kuta
ula magin-magin kula anak singuda
Didong doah si pulu kerangen
ula nembeh kempak tanehta
nggo radas kerina kerangen meratah
nggo melus mbal-mbal kerbo perjalangen
nggo canggah lembu la mbera nggagat
Mido-ido blobat permakan
nehken kata si erbahan pusuh mesui
Lanai terturiken suina e
o si nepa kami
Lanai terturiken lengetna e
o tendi singarak-ngarak kami
Ersepuh nge min kata ni belas
o singiani pusuh peraten kami
Gelah erbuku min kiniseran ras perbeben kami
Ku didong kudoah kam simada kegeluhen
pulu si mbelin si empuna sinasa lit
Sudipken kami menda toto salangsai
gelah nggo salang ukur kami gulut
gelah tendi ulanai termampa-mampa
ku rumahlah kam arah pintu kemuhen
nggo sikap sangkep nggeluh ngalo-ngalo kam
rikut me kami kami tunggkuk nembah alu jari sepuluh
nggo salang dalanndu mari dage bengket
embari dage kami o pulu doni si mehaga
Saimara ku rumah tendi sibadia….
Ralep alep…… ralep…. alep….
Dahi dage kami
nggo talang pintun pusuh kami
nggo sikap amak kimbang bas jabu tendi kami…….