Bual-bual La Bual: ERGULA

1
184

Alexander Firdaust Meliala (Medan)

 

alexander firdaustergula 1.Ibas nanggerken lau pola jadi gula gara, e me kap sitersinget gelarna ergula ibas kita kalak Karo. Maka lit me piga-piga tahapen na rikut pe perlu waktu cukup ndekah nanggersa (7-12 jam). Enda tergantung uga buena lau pola si man tanggerenken e, rikut pe uga pergarana apina. Kenca lau pola e itanggerken, janah adi enggo salih rupa lau pola ndai jadi megara. Ibas si e, gelar lau pola enggo ikataken salih jadi tengguli.

Adi lau pola enggo salih jadi tengguli, maka tengguli e enggo banci isusun janah lanai ceda. Bicara sitik ngenca lau polanta, banci ipepulung lebe ngasa mbue. Kenca denggo pagi mbue tengguli ipepulung, je sekaligus pagi itanggerken kerina jadi gula.

Adina tengguli e iterusken itanggerken, maka dungna lit ka teridah perubahen bentukna. Adi tengguli bentukna agak cair denga, gia rupana enggo salih megara, maka perubahen seterusna tengguli ndai enggo teridah rugup (berbuih) kitik-kitik, janah bentukna pe enggo mulai kental. Jenda gelarna enggo ka salih jadi erbunga sabi.


[one_third]
[one_third_last]Ermata Lembu[/one_third_last]
[/one_third]

Perubahen bentuk seterusna pe teridah adina igarai terus apina, ija ugup si kitik ndai enggo salih jadi galang, janah ijenda gelarna enggo ka salih jadi ermata lembu.

Adi lau pola enggo ermata lembu, maka enggo banci tama kembirina, segelahna gulana denggo kenca tasak jadi mersik, rikut nanamna pe lit permelamna. Ibas tahapen sienda, apina enggo banci isuruti entah pe ipekitiki.

Kenca salih rupa bahan e ku mbiringna, berarti enggo nangdangi tasak, maka ibas paksa si e, tepeng (alat pencetak gula) pe enggo banci isikapken.

Adi tepeng enggo sikap, bahan pe enggo banci iangkat, janah ertima ngasa mbergeh sitik bahan e (kurang lebih 5 menit), maka tahapen selanjutna bahan ndai enggo banci itamai manjar-anjar ku tepengna.

Adina bahan ndai enggo dung itamai kerina ku tepeng, maka kenca tuhu-tuhu mbergeh ia, enggo banci iagoi tepengna, janah sekaligus pe enggo salih kerina bahan jadi gula gara.

Bagendam sitik sikuinget tahapen-tahapen nanggerken lau pola jadi gula gara, gia situhuna mungkin banci jadi nge mbue denga hal-hal si terlupa ibas tulisen enda. Amin bage gia mbera-mbera tulisen enda banci ngingetken kita kerina nangdangi salah sada profesi kalak Karo sinoria, emekap ergula.

1 COMMENT

  1. Menarik janah perlu rusur info ras tulisen sibagenda, gelah ula kita lupa perbendaharaan kata-kata Karo, bas erbahan gula gara enda. Terutama menarik tingkat-tingkat (fase) bas nanggerken lau pola enda: pola, tengguli erbunga sabi terus ku ermata lembu je nari kari maka ikataken jadi gula gara. Tama ka kepeken kembiri, maka melam. Payo seh tabehna gula gara enda.
    Melala ka singatakenca gelarna ‘gula batak’, salah nama atau sengaaja isalahken nginget persaingen etnis si nai lenga masuk akalta. Kai pe ibatakken termasuk Karo sendiri.
    MUG

Leave a Reply