Anak Pengungsi Sinabung Ndungi Sekolah (3)

1
255

Nisuratken: Sartika beru Karo (Medan)

 

ampam 1
Penulis sanga erbinaga ampam man tukang beca i Pajak Sore, Padangbulan (Medan)

Ndaftar ulang me ningen, perlu biaya Rp.5.400.000 paksa sie. Sen nande Rp. 200.000 ngenca. Tapi, aku tek Tuhan si ncukupken kerinana sebap Ia kap namakensa aku kubas perguruan tinggi negeri enda, ateku.

Emaka reh me penampat ibas keluarga nari tersitik-sitik. Dungna bias me sen e. Kos me aku i Pasar Sada ras teman. Sen kos Rp.2.500.000 per tahun janah sen bulanen Rp. 600.000. Emaka perpan pe terbatas adina teman-teman e rata Rp.800.000 – 1000.000.

Lit dekahna 2 tahun aku ije. Tahun peteluken naik sen kos jadi Rp.3.000.000 la tergalari orangtua. Emaka tamana aku ku Pasar 6 Gang Singalorlau. Kondisi rumah e cukup darurat. Enggo lit 10 tahun la iingani. Sengna bocor, lampuna pe la lit, kamar mandi la lit. Perban lit belakang bas pekarangen rumah e sumur tua eme kuban lau nuci. Adi ridi ku rumah tetangga aku.

Terkadang mengeluh ka aku. “Tuhan, uga maka sesakit enda pergeluhku?” ningku je sisada tapi pusuh ku ngata kensa “pergeluhndu e pagi banci jadi kesaksin man jelma sinterem” nina kubegi.


[one_fourth]Deleng Sinabung pe mulihi erupsi [/one_fourth]

Lit dekahna 1 tahun aku ibas Pasar 6 tading. Deleng Sinabung pe mulihi erupsi bulan September 2013. Emaka kirimen pe kadang reh terlambat gara-gara penghasilen orangtua lanai lit. Mekatep ka aku ngaluni tetangga tapi diberu saja. Kadang dilakina ka pe adi je diberuna. Sitik pe la aku mela, si penting halal sikudalanken janah nampati bas aku la ngerepotken orangtuaku ateku. Kupepulungi me sen gelahna banci pindah tanpa mindo sen orangtua.

ampam 2Singkat cerita, November 2013. Pindah me aku ku sekitar Pajak Sore (Padangbulan, Medan). Aku enggo Semester 7, enggo banci ngajuken judul skripsi. Awal Semester 8, lit beasiswa ibas sada yayasen  i Jakarta  gelarna emekap Yayasan Sapo Ribu. Emaka terpilih me aku salah sada ibiayai kuliahku ngasa tamat. Ibas tiap bulanna ikirim ku rekening Rp.1.000.000. Ibas si e aku pe la lupa bersyukur man Dibata, sebab kueteh sie kerina emekap pasu-pasuNa.

Bulan 7, kuajuken me judul skripsiku “Dampak Bencana Pasca Meletusnya Gunung Sinabung Terhadap Kehidupan Sosial Ekonomi Masyarakat Desa Bekerah Kecamatan Naman Teran Kabupaten Karo”. Emaka iterima dosen me judulku e.

Sempat 2 bulan skripsiku la kukerjai perbahan stres kel aku enca bencana Sinabung la dung-dung. Kuidah teman-temanku enggo ka dung deba. Emaka semangat ka aku. Adi la kari kukerjai orangtuaku ka nge si mberat adi reh dekahna aku i Medan enda ateku.

Bulan Agustus, kuajuken me proposalku si enggo kukerjai. Kenca piga-piga kali revisi emakana seminar proposal me aku awal bulan September. Kukerjaken terus skripsiku e emakana acc ku lapangen, acc Bab V. Kenca sie kukerjai kerina  emakana piga-piga kali ka aku revisi. Acc me aku sidang ntahsa pe meja hijau.


[one_fourth]eme kap sen kos enggo nunggak[/one_fourth]

Ujian meja hijauku erdalan salu mehuli dingen la kekurangen sada kai pe emaka sah me aku jadi sarjana sosial aminna lenga gia aku wisuda. Kenca sidang, lit ka man ukuren eme kap sen kos nggo nunggak selama 2 bulan ras sen listrik. Emaka ngerana me aku ras ibuk kos.

“Bi, sabar kam lebe, ya, aminna nunggak pe sen kosku e kugalari nge pagi.” ningku.

“Ue, nak, labo dalih,” nina ibuk kosku ndai.

Rukur aku, la mungkin kupindo sen ku kuta adina pemasuken nande ras bapa pe la lit. Agi pe sekolah,  man pe mesera akapna, ateku. Ije nari me bena-benana aku erdaya cimpa tuang ras agar-agar ku pajak sore.

“Cimpa tuang, bibi, bapa, kakak, abang,” ningku adi jumpa aku ras kalak e la ku eteh mela aminna terkadang tokohi kalake.

“Cantik-cantik kok jual cimpa?” nina.

Tapi, si penting nanamna nge si kata tuhu. Ibas aku erdaya e ngasup aku memenuhi kebutuhan hidupku ras banci nampati orangtuaku, bage ateku. Emaka, adina tokohi kalak aku kusenyumi saja. Prinsipku ibas nggeluh enda, la lit si la mungkin adina kita nggit berusaha dingen ertoto man Dibata janah mindo restu orangtua. Pasti  berhasil.

Bulan Feberuari tahun 2015 makana aku iwisuda i Universitas Sumatera Utara janah enggo sah jadi Sarjana Sosial. Perjuangenku sedekah enda la kepe sia-sia.

Sada pesanku man generasi muda Karo, ise pe kam si mbaca tulisenku enda ula kita mela-mela erkai pe asalken halal. Semangat terus ibas sekolahndu. Terlebih mungkin lit antara kam si orangtuana mampu mencukupi kebutuhenndu, bersyukurlah kam. Dalanken tanggungjawabndu si enggo ipercayaken orangtua man bandu gelahna banci pagi si pesikap Tanah Karo kuta kemulihenta (Tammat).

Tulisan terkait:

Anak Pengungsi Sinabung Ndungi Sekolah

Anak Pengungsi Sinabung Ndungi Sekolah (1)

Anak Pengungsi Sinabung Ndungi Sekolah (2)



1 COMMENT

Leave a Reply