Puisi: SURAT NANDE NANGDANGI ANAK

0
298

Nakku,
Arah surat enda ateku nuriken taktak cibal geluhku pepagi, nakku..
Ateku min, nakku, kam min pagi inganku metua
Ateku min, aku tading i tengah-tengah jabundu

nakku,
Kentisik nari aku go metua,
Gegehku pe lana bo lit
Pembegiku pe nggo bagi sikurang
Pengangkai ku pe lanai bagi sigel-gel,
Nakku, kune pagi aku ilebuhndu
Nande… nindu, nakku, la kubegi…
O Nande.. nindu, nakku, la kubegi…
O Nande… nindu, nakku, enpe la kubegi
Ola min katakenndu,
Uga kel nge pasekndu e, nande?
Ola min bandu gelarku Si Pasek..

Nakku,
Kune pagi metumbursa akapndu aku i tengah-tengah jabunndu,
Tah mambur gia kuban pagi lau perburihen,
Tah ndabuh pagi kuban gelas tengah jabundu
Perbahan tanku pe enggo enggir-gir,
Ola min mis pagi katakenndu
Ja nge banndu matandu e, nande?!
Ola min mis pagi aku jungutindu..

Nakku,
Kune pepagi idahndu bajuku siganjangen
Tah terbalik gia pagi aku make selopku
Ula min mis pagi katakenndu
Uga kel nge kolihenndu e, nande??!!
Pemela-melaken man jelma sienterem kam lalap…

Tapi ingetndulah,
Ingetndu kitik belinna kekelengenku man bandu
Ingetndu kekelengenku mulai kam kitik nari seh asa genduari
Ingetndu uga aku ngadep-ngadep kam, nakku..
Ija sanga kam kitik denga, Ija dagingndu kotor aku simbersihisa
Ija daginngndu kote tangkelenku nge silanai jore
Kai si pindondu, asa ngasupku kusehi nakku
Kugengken ngutang ras pe dagingku merance guna nehi pemindonndu, nakku

Nakku,
Kune pagi aku lanai lit i doni enda
Kune pagi aku enggo idilo Dibata
Ije pagi, nakku
Kukataken pagi man Dibata,
Kukusikken pagi man Malaikat,
Bapa, berekenndu min kemalemen ate man bana, Bapa
BerekenNdu min kejuah-juahen i tengah-tengah jabuna, Bapa
Gelah ola lit sinanggel ibas pusuhna, Tuhan, Kelengkel ateku bana Bapa lebih asa dagingku jine.

BY : Simson Ginting


Leave a Reply

This site uses Akismet to reduce spam. Learn how your comment data is processed.