La kel mbarenda ermedu-medu babahku ersumekah
Nuriken kerna percibal geluh parang sintengah
Sibali kel bagi perusah kerbo ku lau
Perusahna ibuat i duru dalin, turang
Dung kenca anak kerbo iusah
Perusahna iambengken kempak simaler
Tah bage kel nge pagi perkeleng kena kempak aku
Emaka sik-sik lebe mbages-mbages jine ningku
Mama Karondu pe labo mejar-jar, agi
Bagi sinukur timbako i tengah tiga
Leben menda isesap maka tukur, agi kakana
Jah enggome dedas ukurku maka kam me si jadi pematang
Ateku, maka erbunga min gelah arih-arihta
Gelah bungana jadi rudang-rudangta
Mutikna jadi ayam-ayamta, agi
Janah buahna pagi jadi guro-guronta duana, bayu
Eggo kin kena ngasup radumken aku siperliah
Pergeluhna pe bagi kaba-kaba i tengah lawit simangko-angko inganna
Enggo kin kena ngasup radumken aku
Siperliah pergeluhna pe bagi kaba-kaba i tengah lawit simangko-angko
Inganna kabang lanai bo tuhu mbelang
Tapi endam, inganna cinep nge bagi sikurang
Ula pagi kena mandangi roka dung peranin, kaka
Lanai bo kurang nuhit atendu jadi paksa timbas daging kubaba
Kenca ku jabu mama Karo, daging pe tambah tuana janah kurum pe bagi si mekelbuk
Ije ka me pagi kena tinggi darehen, kukelengi
Meruntuh me pagi langit kutare, agi
Meturbanlah pagi taneh kudedeh
Kune erpenulak parang sintua kempak kena
Kupadanken maka kam me pagi sirukat nakan
Janah si ngkelengi nande simupus Karo mergana, nindu jine
Tapi kenca genduari osarindu padan si ndube
Meriso pusuh nibaba tangis teriluh menda tendi
Mbarenda rumat gundari mersap me ate ngena ndube
Teman tawa kepe ngenca enterem teman tangis bagi sikurang
Sekali enda surung me Biring erdalin mbelang
Lanai bo lolo kudalani me pagi dalin si meluk-eluk
Bagi manuk nusur ibas terangna bulan
Jingkang erpala-pala, nde perdalan pe terjelpa-jelpa
Emaka sirang me dage kita, kaka
Sampur menda iluh bre Ginting terisang
Kerah kutenten, upah tendi sila surung
La kena apulen, turang Karo mergana