Turgen: CIH RAS SI PAIS

Nituriken: Sas Lingga (Kabanjahe)

 

sas linggapais ras cihBas sada wari, ercakap me Pais ras Cih. Maka nina Pais ngempak Cih (paksa si e Pais reh ia minem ku tepi lau): “O, Cih! Uga akapko adi erlumba kita sekali? Ugapa pe talu nge engko. Perdalanmu pe medek-edek. Lo seh-seh asa ko mate.”

Bage me nina Pais man Cih alu kesombongenna.

Ngaloi Cih ngempak Pais: “Adi bage kin nindu, eak dage, yah. Erlumba kita.”

Sada me arih kalak enda erlumba pedas. Cih bas lau, emaka Pais arah darat tepi lau e.

“Uga carana metehsa ise kita leben?” nina Pais ngempak Cih.

“Asa pedasna saja ko kiam. Kiamken saja ula singadi-ngadi. Ja ko seh gelah tehmu aku enggo je kari seh. Gelari saja aku. Cih nim mis ngaloi aku kari,” nina me Cih.

Benakenna me erlumba ndai. Hitung… 1, 2, 3! Kiam me Pais asa pedasna. Enggo akapna ia menang maka erbelas ia.

“ Cih!”

Mis ka ngaloi cih silit arah lebena.

“Enda aku Cih.”

Kiam ka mis Pais asa pedasna. Enca ndauh ia kiam, uga pe enggo talu cih sekale, atena. Erbelas ka ia.

“Cih!”

Ngaloi ka arah lebena bas lau nari.

“Cih!”

Kiam ka ia. Enca ndauh, “Cih!” nina ka. Begina ka lebe nari “Cih!”

Bage me lalap mulai benaken seh ngasa ben Pais la ngadi-ngadi kiam. Asal “Cih!” nina ngaloi ka lebena nari bas lau e “Cih!”

Ngasa dungna ngaku talu Pais, maka ia talu ban Cih. Nina Pais: “Cih kenjahe, Cih kenjulu.”

Cataten: Cih = siput; Pais = kancil


One thought on “Turgen: CIH RAS SI PAIS

  1. Turiturin tua si aktual gundari enda pe.
    Adi “cih” kari ijapape enggo pasti menang Karo enda bas perlombaan etnis enda ndai,

    Bujur
    MUG

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.